Dumanon iti agarup P1,690,000 ti inisyal a gatad dagiti nakumpiskar nga iligal a droga bayat ti naipatungpal nga anti-drug operation iti rehiyon Cordillera idi napalabas a tawen.
Iti eksklusibo a panakiuman ti Bombo Radyo kenni Rosel Sarmiento, Spokesperson iti Philippine Drug Enforcement Agency (PDEA)-Cordillera, kinunana a manipud Januasry 1 agingga December 31 idi napalabas a tawen ket 1, 440 nga anti-drug operation ti naipatungpal a pakairamanan iti buy-bust operation, marijuana eradication, search warrant, ken raid.
Sigun kenni Sarmiento, ti kangrunaan a nakumpiskar a droga iti rehiyon Cordillera ket ti marijuana kagiddan met ti agtultloy a panakabigbig ti nasao a rehiyon kas kangrunaan a pagtataudan daytoy.
Maibasar iti datos, ti probinsya ti Benguet ken Kalinga ti kangrunaan met a pagtataudan ti marijuana rason a daytoy ti bambantayan dagiti otoridad
Nupay kasta, adda metlaeng iti madisdiskubre a kapada a mula kadagiti daduma pay a a probinsya ti Cordillera kas iti Mt. Province.
Iti sabali a bangir, shabu met ti kadawyan a nakumpiskar dagiti kameng iti nasao nga opisina kadagiti insayangkatda a buy-bust operations.
Ti siudad met ti Baguio ti kadawyan a pakapaspasamakan dagiti transaksyon kadagiti iligal a droga gapu ta saan a mailibak nga adda dagiti gundaway a kagiddan iti irarang-ay ti maysa a lugar ket ti panakapasamak met dagiti iligal nga aktibidad.
Sigun kenni Sarmiento, pudno a mabalin nga agtubo manen dagiti marijuana nupay kasta, nangruna ta maibasar iti ipatpatungpalda a marijuana eradication, naobserbaranda a dagiti plantasyon ket maay-aywanan ken maigaggagara a mamulmulaan.
Kabayatanna, awan met ti nailista ti Philippine Drug Enforcement Agency (PDEA)-Cordillera a politiko nga adda iti pakainaiganna iti iligal a droga nangruna ita nga umadanin ti eleksyon a mabalin a maaramat iti panagkakampanya dagitoy.
Iti agdama, maur-uray paylaeng ti baro a mandato a maipatungpal ita a tawen nga ipaiyulog ni Director III Derrick Arnold C. Carreon, ti baro a nadutokan a hepe ti Philippine Drug Enforcement Agency (PDEA)-Cordillera.//Bombo Mera Pacpacan
