Dumanon iti P121.88 Million ti gatad dagiti nadadael iti sektor ti agrikultura gapu iti epekto ti bagyo a Crising ken southwest monsoon iti pagilian.
Maibasar iti datos ti Department of Agriculuture – Disaster Risk Reduction and Management Operations Center idi July 22, 2025; ngimmato iti 7,911 nga ektaria ti talon ti naapektaran no sadino, nasurok 1,300 nga ektaria ti totally damaged.
Malaksid iti dayta, nadadael ti agarup 3, 075 a tonelada ti nagduduma nga agri products.
Naapektaran pay ti agarup 6, 377 a mannalon ken mangngalap.
Kaaduan kadagiti nadadael ken naapektaran ti rice industry a dumanon iti 90.51%, bayat a dagiti dadduma ket pakairamanan ti mais, high value crops, poultry, fisheries, ken dadduma pay.
Kangrunaan a naapektaran dagiti talon iti probinsia iti Cagayan, Tarlac, Bataan ken Negros Occidental.
Kabayatanna, mabalin a maipaay kadagiti mannalun a naapektaran kadagiti kalamidad ti P495 Million a gatad ti agri inputs manipud iti regional office ti Department of Agriculture (DA).
Sigun iti DA, mangisaysayangkat iti assessment dagiti field office ti Philippine Crop Insurance Corporation (PCIC) para kadagiti mannalon ken impasiguradoda a nakasagana ti insurance claims dagitoy.
