BAGUIO CITY – Mapattapatta dumanon iti agarup P4-M ti gatad dagiti nauram nga uppat a babbalay sadiay Obulan, Beckel, La Trinidad, Benguet idi kalman.
Sigun kenni SFO2 Wilfred Dorencio, imbestigador ti Bureau of Fire Protection – La Trinidad, agtultuloy paylaeng ti imbestigasyonda iti kangrunaan a rason iti napasamak nga uram.
Kinunana nga iti pannakipatangda kadagiti maseknan a pamilya ket naamuan a 1960 a naipasdek dagiti babbalay iti nasao a compound a naaramid iti kayo ken sisim.
Innayonna a nabayag wenno daan met laeng ti electrical installation dagitoy a posible a nagtaudan ti uram.
Naamuan nga agkakabagian dagiti agtagikua kadagiti nasao a babbalay a nabigbig a da Camilo Maranes, Sarina Maranes, Benjie Maranes ken Bernard Maranes.
Agkidkiddaw met ni Mr. Bernard Maranes iti tulong ti lokal a gobyerno ti La Trinidad nangruna ta awan ti naispalda a kagawaan manipud iti pagtaengan dagitoy.
