BAGUIO CITY – Marugian ita a tawen ti panakaitampok ti Giant Strawberry Cake kas maysa kadagiti regular highlight ti Strawberry Festival sadiay munisipyo ti La Trinidad, Benguet.
Nupay kasta, kinuna ni Municipal Tourism Officer Valred Olsim a ti strawberry cake a maiparang iti pestibidad ket saan a kas iti kadakkel ti naaramid idi March 20, 2004 a nanggun-udan ti munisipyo iti Guinness World Records para iti World’s Largest Strawberry Shortcake.
Kinunana a ti maiparang a cake iti malem inton Marso 19 ket 3/4 laeng ti kadakkel ti orihinal a Giant Strawberry Cake ti La Trinidad.
Manarimaan metten ti panakikoordinarda kadagiti grupo ti bakers sadiay tapnu adda ti mangasikaso iti proyekto a nailatangan iti pondo a P250,000.
Innayonna nga agtalinaed met laeng a paset ti pestibidad ti ‘Strawberry Lane’ a pakaiparangan dagiti nagduduma a kita ti cake a ti kangrunaan a ramenda ket strawberry.
Naamuan nga adu a turista ti masansan a mangbirbiruk iti Giant Strawberry Cake isut gapuna a kiniddaw ni Olsim ti panakaisubli ti nasao a highlight ti pestibidad.
