BAGUIO CITY – Nagnumar iti Assistance In Crisis Situations (AICS) iti sidong ti emergency welfare program ti City Social Welfare and Development Office (CSWDO) ti Baguio ti pakabuklan a 668 a kliyente manipud Enero 1 agingga Hunyo 15 ti agdama a tawen.
Nakaawat dagitoy iti tulong pinansial a katukadna ti P776,500.
Malaksid iti daytoy, kinuna ni CSWDO deputy chief Liza Bulayungan a 408 nga indibidual ti nagnumar iti medical assistance fund dagiti opisyales ti siudad sadiay Baguio General Hospital and Medical Center nga addaan katukad a P486,350 iti kapada a panawen.
Kinunana nga adda met dagiti nai-refer iti dadduma a partner government ken private entities para iti kasapulan dagitoy a support services.
Dumanon met iti 6,683 a kliyente ti naipaayanda iti relief assistance, no sadino, nakabusbos ti CSWDO iti P3.948-M para iti panakagatang dagiti relief goods a naiwaras kadagiti benipisaryo iti nasao a panawen.
Kabayatanna, dinakamat ni Bulayungan a 49 nga indibidual ti nagnumar iti Balik Probinsya Assistance Program, no sadino, nagawid dagitoy iti nagtaudanda a probinsia kalpasan a naapektaran ti pagbiaganda ditoy siudad gapu iti manarimaan a pandemya.
Innayonna a mapasangpet ti siudad ti kanayonan a benipisaryo ti programa manipud iti dadduma a rehion.
Natulongan payen ti CSWDO babaen iti Emergency Shelter Assistance Program ti 18 a pamilya a napukawan wenno saan ket nadadaelan ti pagtaengan gapu iti uram.
