Agtultuloy ladta ti giyera iti nagbaetan ti Israel ken Lebanon nu sadino iti laksid ti panakaiulog ti ceasefire ket mapaspasamak ladta daytoy.
Iti panakiuman ti Bombo Radyo kenni Bee Francisco, Overseas Filipino Worker sadiay Lebanon, impakaammona naimatanganna dagiti pagsabog ken panakaipatayab ti missile iti nasao a pagilian.
Nu pay kasta iti laksid ti agtultuloy a giyera, napagdesiyunan ni Francisco nga agtalinaed pay laeng sadiay Lebanon ken saan pay nga agparepatriate pasubli iti pagilian a Pilipinas.
Sigun kenni Francisco, saan a daytoy ti umuna a gundaway a napasaranna ti nasao a kasasaad gapu ta ti kinaaddana sadiay ket isu ti maikadua a gundaway.
Agyamyaman met daytoy iti gobyerno ti pagilian gapu ta saan nga agsarsardeng ti embahada ti Pilipinas a mangipaay kadagiti pagkasapulanda kasta met ti panangpasiguradoda a nasayaat ti kasasaadda.
Malaksid iti dayta, kanayun nga ibagbaga ti embahada ti repatriation kadakuada.
Nakasagana metten ti papeles ni Francisco nu kasbilang kayatna nga agsubli ti pagilian.
