BAGUIO CITY – Pinaglibakan ti gobernador ti Benguet ti alegasyon nga adda ti maaw-awat dagiti doktor a komision no adda dagiti matay a pasyente gapu iti COVID-19 sadiay Benguet General Hospital.
Sigun kenni Governor Melchor Diclas, saanna a patien ti nasao nga isyu.
Nupay kasta, kinunana nga adda ti pinirmaan ti provincial government ken ti ospital a Memorandum of Agreement iti maysa a kompanya para iti panakaiproseso dagiti COVID patients a pimmusay gapu iti nasao a sakit, partikular ti panakai-cremate dagitoy.
Inlawlawagna pay a napagnunumuan ti nasao a katulagan gaputa saan nga amin a bangkay ket maipapatarimaan kadagiti punenarya.
Impettengna metlaeng a scientific wenno agbasbasar dagiti ospital iti proseso kadagiti laboratoryo iti agbalbalin a resulta dagiti swab test ken saan a mapugpugtuan laeng.
Insungbatna daytoy iti isyu a manipud nangrugi ti pandemya ket maar-aramat ti account iti PhilHealth kas basaran iti agbalin a resulta ti swab test, no sadino, positibo ti resulta no addaan ti kliyente iti PhilHealth bayat a negatibo no awanan ti PhilHealth.
Inlawlawagna daytoy kasaruno metlaeng dagiti alegasion a dakkel iti maguyguyod wenno maal-ala a kontribusyon manipod iti account iti PhilHealth.