BAGUIO CITY – Narugian ti panakarambak ti Golden wenno 50th Foundation Day ti Mountain Province idi kalman babaen iti naisayangkat a civic parade.
Iti panagbitla ni Governor Bonifacio Lacwasan Jr. iti opening program, impettengna a ti Golden Anniversary ken ti 13th Lang-ay Festival ti Montañosa ti avenues tapnu mapabileg pay ti relasyon dagiti umili, lagipen ti napalabas ken paunegen ti panangapresiar ken ti panangprotektarda iti cultural heritage dagitoy a mangmarmarka iti pakabigbigan ti probinsia dagitoy.
Iti met panagbitla ni Congressman Maximo Dalog Sr., binigbigna ti presensia ken kontribusyon dagiti nagduduma a sektor iti 50 a tawen ti probinsia.
Dinakamat pay ti kongresista ti suporta ti Duterte Administration para iti maisaksakad nga otonomia ti rehion Cordillera kagiddan ti panangibalakadna iti agtultuloy a panagkaykaysa dagiti umili ken impettengna pay ti kiddawna para iti Cordillera Autonomous Region.
Pinasangbay met dagiti local government officials dagiti sangaili a da DOT USec. Falconi Millar, PCOO ASec. Marie Banaag, Kalinga Governor Jocel Baac, Vice-Governor James Edubba ken dagiti miyembro ti Cordillera Regional Development Council.
Inyam-ammo ni PCOO ASec. Marie Banaag ti guest of honor and speaker a ni PNP Chief Ronald “Bato” dela Rosa a na-adapatar nga anak ti Montañosa.
Iti panagbitla ti dadaulo ti PNP, kinablaawanna ti Mt. Province ken ti rehion kas ‘drug-free areas’ kagiddan ti panangguyugoyna kadagiti tattao iti agtultuloy a panangsuporta dagitoy iti laban kontra iti iligal a droga.
Immuna iti daytoy ket simmarungkar pay sadiay munisipyo ti Sagada ni PNP Chief Dela Rosa, naki-selfie ken naki-ala iti ladawan kadagiti umili ken turista a nadanunanda iti nasao a lugar.
