BAGUIO CITY — Impaiman ti National Commission on Indigenous Peoples (NCIP) – Cordillera iti Baguio City Jail ti maysa a livelihood project para kadagiti balud nga Indigenous Peoples (IPs) wenno dagiti nainsigudan nga umili.
Sigun kenni NCIP-Cordillera regional director Roland Calde, panggep ti Gong-Making Project for IP Detainees nga ipaayan dagiti maseknan a balud iti pagbiagan kabayatan ti kaaddada iti pagbaludan.
Kinunana a babaen pay iti nasao a proyekto ket mapasayaat ti abilidad dagiti balud nga agaramid iti gangsa.
Imbingayna a nakaawatda iti surat manipud kadagiti nainsigudan nga umili a nakabalud iti Baguio City Jail seknan iti kiddaw dagitoy a proyekto.
Gapu iti daytoy, nangilatangda iti P200,000 para iti panakagatang dagiti materyales iti panagaramid ti gangsa.
Karaman kadagiti materyales nga impaimada iti Baguio City Jail para iti nasao a proyekto ket aluminum flat sheet, sledge hammer, ball-peen hammer, dua a tonelada ti crocodile jack, maysa nga acetylene set ken dadduma pay a maar-aramat iti panagramid ti gangsa.
Innayon ni Calde a tumulong pay ti NCIP-Cordillera iti panakaisayangkat ti panagsanay ken demonstration para kadagiti balud.
Kinaritna pay dagiti balud tapnu de-kalidad a gangsa ti aramiden dagitoy tapnu tumulong ti ahensiada nga agbiruk kadagiti agbalin a kustomer dagitoy.
