Manamnama nga ibagi ti maysa a Grade 12 student manipod Philippine Science High School-Cordillera campus iti siudad ti Baguio iti maipatungpal nga International Biology Olympiad idiay Kazakhstan.
Manipod iti rinibribu nga studiante iti Pilipinas, napagasatan ni Maria Angela Yabut, 19-anyos, a makipaset iti nasao a kompetision.
Iti exclusive interview ti Bombo Radyo kenkuana, kinunana a manarimaan ti panagsagana, ken panagreview wenno panagsanayna kadua dagiti dadduma pay nga studiante manipod iti Philippine Science High School-Main Campus ken manipod Saint Jude idiay Metro Manila.
Sakbay ti pannakakwalipikar ni Yabut, inaklonna a narigat ti exam ken ibilangna a maysa daytoy kadagiti karigatan a na-examna a naisayangkat idiay Ateneo de Manila University manipod Marso 15 agingga 17 iti agdama tawen.
Nu pay kasta, pagyamyamananna latta ni Yabut gaputa saan a “memorization” ti kita iti exam nu diket “critical thinking” ken “understanding”.
Imbinglayna nga immuna a nakastrek daytoy iti top 55 finlasists, agingga a naalana ti top 20 ken top 5 nga isut rason ti pannakagun-odna iti puesto para iti International Biology Olympiad.
Dagiti kakaduana a nakibinnalubal manipod iti rehiyon Cordillera nga “student-biologists” ket da Juliene Nathalia Barcellano, maysa a grade 10 ken Joe Mark Aglolo, Grade 12.
Ti International Biology Olympiad wenno IBO ket naisangsangayan a kompetision para kadagiti “biology students” ken studiante manipod iti sekundarya.
Panggep daytoy a pagtitipunen dagiti maibilang nga “studen-scientists” tapno kariten ken ad-adda a mapalaing pay dagiti talento ken kabaelan dagitoy ken tapno maitandudo ti masanguanan a karerada kas maysa a “scientists”.
Maipatungpal ti nasao a kompetision inton July 7 agingga 14 iti agdama a tawen nu sadinno, manamnama ti sangaribo a participants manipod iti nasurok walo pulo a pagilian.
Kabayatanna, namnamaen ni Yabut ti suporta manipod iti publiko nangruna kadagagiti umili iti rehiyon Cordillera.
