Pimmusay ti maysa a 14-anyos a Grade 8 student kalpasan a binagsol ti 15-anyos a kaklasena iti uneg ti Las Piñas National High School idi Biernes, July 31, 2026.
Sigun kenni Police Colonel Fermin Armendarez, hepe ti Las Piñas City Police, ti Child in Conflict with the Law (CICL) ket naipaima iti city social welfare agsipudta minor de edad daytoy.
Maibasar iti immuna nga imbistigasyon, naaddaan ti panagsusupiat dagiti dua nga estudiante idi birbiruken ti CICL ti barya daytoy iti biktima, a maatap a nabati iti canteen.
Maatao a kellaat a nangiruar ti CICL iti balisong ket binagsolna ti barukong ti biktima, a saan a nakadanon a sibibiag iti ospital.
Napasamak ti insidente, pasado 3:00 p.m bayat a recess dagitoy.
Sigun kadagiti otoridad, inarestar dagiti security guards ti CICL iti uneg ti pagadalan.
Kasaruno ti insidente, nangiruar ti Las Piñas National High School iti statement a nangipeksa iti panagladingit gapu iti napasamak a kinaranggas iti laksid ti maatap a nainget a polisiya para iti kinatalged ken seguridad iti nasao a pagadalan.
Impanamnamada ti pannakitinnulong ti pagadalan kadagiti otoridad mainaig iti agtultuloy nga imbestigasion.
Kabayatanna, kidkidawen ti Las Piñas National High School iti publiko nga agannad ken agbalin a responsable iti panagaramat iti social media ken saan a agiwaras kadagiti sensitibo ken saan a beripikado nga impormasion, ladawa wenno video a mabalin a manglapped iti imbestigasion.
Kikiddawena metlaeng ti natibtibker a singgalut iti nagbaetan ti pagtaengan, eskuelaan, ken komunidad tapno maaddaan dagiti estudiante iti disiplina, panagraem kadagiti dadduma, ken responsabilidad.