Kinarit ti grupo dagiti mannalon a Kilusang Magbubukid ng Pilipinas (KMP) ni President Ferdinand Marcos Jr. ken dagiti opisyales ti Department of Agriculture a lutoenda, kanenda ken ipakanda iti pamilyada iti sango ti publiko ti nabayagen wenno daan nga NFA rice a planoda nga ilako kadagiti tattao iti nababa laeng a presyo.
Immunan nga inwaragawag ti gobyerno nga ilakoda ti daanen nga NFA rice buffer stocks kadagiti vulnerable sectors kas iti persons with disabilities, solo parents, senior citizens ken indigenous people iti P29 tunggal kilo gapu ta sigun kadakuada ket uray nabayagen daytoy ngem mayat pailaeng a makan.
Sigun kenni Danilo Ramos, Chairperson ti Kilusang Magbubukid ng Pilipinas, ti panangilako ti gobyerno iti nabayagen a bagas kadagiti vulnerable sector ket mangipakpakita a mas pilienda a pababaen ti panangkitada kadagiti nakukurapay a Pilipino imbes a sulbarenda ti nangato a presyo ti bagas ken dadduma pay a gagatangen.
Inawagan ni Ramos kas “pathetic attempt” ti Bigas 29 a programa ti Department of Agriculture kas aksyonda iti pannakaibaba ti nangato a presyo ti bagas iti pagilian.
Pagladladingetan pay ti nasao a grupo ti plano ti gobyerno nga ag-angkat ti 363,697 metric tons ti bagas tapno laeng masuportaran ti Bigas 29 program.
Impeksa dagiti mannalon a dagiti laeng rice importers ken rice traders ti agnumar iti Bigas 29, maysa a repackaged rice importation program iti rehimen ti agdama nga administration.
Manamnama a mairugi ti panangilako ti gobyerno ti daan a bagas wenno ti Bigas 29 inton umay a bulan.
