BAGUIO CITY – Balballaagan ti Department of the Interior and Local Government (DILG) – Cordillera dagiti grupo ken indibidual nga agikamkampanya iti federalismo ditoy rehion kasaruno ti sayangguseng nga adda dagiti grupo ditoy rehion a mangikamkampanya iti federalismo.
Sigun kenni DILG-Cordillera Regional Federalism Coordinator Yvonne Balag-ey, adda ti pammilin manipud iti DILG-Central Office a masapul a maipasidong iti seminar ken maipaayan iti akreditasyon dagiti asinoman a grupo wenno indibidual sakbay a mangipatungpal dagitoy iti information dissemination.
Kinunana a panggep ti pammilin a maipanamnama a dagiti mangikampanya iti federalismo ket addaan iti umno a panaka-ammo iti nasao a banag tapnu saan a matikaw wenno mariro dagiti tattao.
Innayonna a mangisayangkatda paylaeng iti panagsanay kadagiti grupo nga agkampanya ken dagiti agserbi nga speakers.
Immuna iti daytoy, maibagbaga nga adda ita dagiti grupo wenno indibidual a mangikamkampanya iti federalismo gaputa kayatda nga agpabigbig ken interesado dagitoy iti pondo a mailatang para iti kampanya ti federalismo.
