BAGUIO CITY–Inaklon ti General Services Office (GSO) ti Baguio City nga adaan iti depekto iti makina dagiti garbage truck ti siudad a mangituntunda iti risgo kadagiti garbage collector ti lokalidad.
Sigun kenni Eugene Buyucan, dadaulo ti GSO, nasurok a walo a tawenen dagiti garbage truck ken kinunana a marigatanda a gumatang manen iti barbaro a lugan gapu iti kinakurang ti pondo ti gobyerno.
Kinunana a dua a grupo ti agsinsinublat a mangibibiahe kadagiti nasao a truck a rason iti nalaka a panakadadael dagiti lugan.
Innayunna a kadawyan nga overloaded iti basura dagiti truck nangruna no maibiyahe dagitoy iti sabali a lugar para iti panakaibelleng dagiti tone-tonelada a basura ti siudad.
Maipalagip a depekto iti makina ti makitkita a rason ti ipupusay ti innem nga empleyado ti GSO ken panakadangran ti uppat a dadduma pay sadiay Marcos Highway idi napalabas a bulan.