Agkur-kurang ti Department of Education (DepEd) iti guidance counselors para kadagiti pagadalan iti pagilian.
Maibasar iti datos, agarup 1,000 ti rehistrado a guidance counselors kadagiti nasurok 45,000 a pagadalan iti intero a pangilian iti baet ti umad-adu nga insidente ti kinaranggas ken bullying.
Sigun kenni DepEd Undersecretary for Human Resource and Organizational Development Willie Cabral, manamnama a maimplementar ti Republic Act 12080 wenno Basic Education Mental Health and Well-Being Promotion Act tapno marisut ti nasao a pakaseknan.
Malaksid iti dayta, manamnama ng ag-hire ti departamento iti 10,000 school counselor associates ita a tawen.
Inlawlawag ni Cabral a naluktan ti 5,000 guidance counselor a posisyon idi 2020.
Nupay kasta, agarup 1,000 laeng dagiti nagaplikar.
Dagiti aplikante para iti school counselor associate ket masapul a nakaturpos iti degree a psychology, guidance and counseling or related courses, nakagun-odda iti saan a kumurang iti 18 a units iti behavioral science ken nakaturpos iti supervised internship iti saan a kumurang iti 200 nga oras.
Maikari ti maysa nga School Counselor Associate I nga umawat iti basic monthly salary a P31,000 ken P2,000 a personal economic relief allowance.