Insaganan dagiti organizers ti singasing a Baguio Fantasy Festival dagiti guidelines para iti Fantasy Parade kas panangbalanse iti creative expression, seguridad, ken family-friendly a panangaramat iti public spaces. Imbinglay dagiti organizers dagiti guidelines kabayatan iti maysa a meeting ti Committee on Creativity ti Baguio City Council nga indauloan ni Councilor Vladimir Cayabas. Daytoy ket kasaruno dagiti napalabas a diskusyon maipapan iti panagbaliw ti Baguio Horror Festival iti Fantasy Festival. Sigun kadagiti naisingasing a guidelines, mabalin nga agala dagiti participants iti inspirasyon manipud kadagiti Filipino folklore, mythology, literatura, international fairy tales, animation, anime, pelikula, telebisyon, video games, science fiction, professions, history, animals, original characters, ken dadduma pay a creative traditions. Impettengda met a saan nga entiramente a maiparit dagiti fantasy, supernatural, ken spooky a tema.
Maiparit met dagiti costume a mangipakita iti pannakailatang wenno pannaka-expose dagiti private parts, dara, exposed organs, dismemberment, wenno realistic wounds.
Maiparit metlaeng ti pannakaaramat kadagiti pudno wenno functional weapons, apoy, pyrotechnics, chemicals, ken dadduma pay a hazardous effects.
Kanayonanna, masapul a natalged nga ikawes dagiti costume iti crowded a public place tapno saan daytoy a mangpataud iti pangta kadagiti participants, spectators, ken traffic personnel.
Maiparit dagiti hate, extremist, illegal drug, ken dadduma pay a prohibited materials, kasta metlaeng dagiti violent, bloody wenno gory imagery.
Sigun kadagiti organizer, saan a panggep dagiti guidelines a manglimit iti creativity wenno mangiparit kadagiti unusual, dark, supernatural wenno mythical characters nu di ket ti kangrunaan a pokus dagiti standards ket no kasano a maipresentar dagiti characters ken concepts.
Maipatungpal met ti pre-parade Costume Check tapno makita dagiti costume nu sumurot dagitoy kadagiti standards sakbay a mapalubosan dagiti participants a makipaset iti parade.
Tumulong met ti Committee on Creativity iti panangpili kadagiti community representatives tapno ma-evaluate dagiti costume iti patas, respetado, ken objective a wagas.
Maibasar kadagiti guidelines, napateg dagiti Filipino culture ken indigenous representations, agraman dagiti traditional attires ken cultural elements, no dagitoy ket maiparang iti narespeto ken umiso a wagas.
Inmpakaammo dagiti organizers a mabalin pay a ma-modify dagiti proposed guidelines.
Impanamnama met ti Baguio City Police Office (BCPO) ti panangipaayda iti tulong para iti public order ken safety, agraman ti crowd control, iti kanito a madesisyonan a matuloy ti proposed parade.
Sigun kenni Councilor Cayabas, masapul nga ag-secure dagiti organizer iti naisangsangayan a permit para iti proposed Fantasy Parade.
Daytoy ket gapu ta ti permit a na-secure da idi para iti saan a naaprobaran a Halloween Parade ket saan a mangsaklaw iti baro a konsepto.
Innayon pay ni Councilor Cayabas a dagiti consolidated guidelines ti proposed event ket maikabil iti report ti Committee on Creativity para iti konsiderasyon ti Baguio City Council.
Kabayatanna, agtultuloy ti panangur-uray iti desisyon ti City Council iti tengnga dagiti nagduduma a panagkita ken diskusyon dagiti residente ti Baguio maipapan iti nasao a proposed festival.//via Bombo Khey Reparip
