BAGUIO CITY – Ipadas a gun-oden ti probinsya ti Mt. Province ti Guiness Book of World Records for ‘biggest patupat’ wenno kadakkelan a suman a tampok iti 13th Lang-Ay Festival inton Abril 3 agingga 9.
Iti pakiuman ti Bombo Radyo kenni Novie Afidchao, provincial information officer ti lokal a gobyerno ti Mt. Province, ti aramidenda a ‘patupat’ ket addaan kangato a tallo agingga iti uppat a kadapan ken kaatidog nga innem a kadapan.
Kabayatanna, kinunana a nangrugi metten ti sumagmamano nga events ti festival kas iti inter municipality volleyball ken basketball.
Sumangmamano kadagiti mapadpadaanan pay a highlight events ket ti cultural exposition, Igorot showdown, indigenous games ken cook fest, street dancing, cultural presentation ken gangsa night.
Iti agdama ket ur-urayen laengen ti provincial information office ti kumpirmasyon manipud iti opisina ni Pres. Rodrigo Duterte ken ni Defense Secretary Jesus Dureza nu dumar-ayda iti nasao a festival.
Ti aktibidad ket addaan iti tema a “Reminiscing and Fostering our Cultural Integrity.”
