Naituding a mangrugi ti election period iti pagilian inton Enero a dose agingga inton Hunyo a onse ita a tawen.
Iti panakiuman ti Bombo Radyo kenni Atty. Elenita Julia Tabangin-Capuyan, Provincial Election Supervisor 3-Office of the Regional Election Director ti Cordillera, kinunana nga iti panagrugi ti election period ket mangrugi met nga agepektibo ti firearms ban wenno gun ban nu sadino maiparit ti panagitugot kadagiti paltog iti ruar ti pagtaengan wenno kadagiti parapubliko a lugar.
Malaksid iti dayta, maiparit met laeng ti panakaadda kadagiti security personnel wenno body guards kasta met ti panangitransport kadagiti firearms ken explosives malaksid nu daytoy ket addaan iti pammalubos wenno otorisasyon manipod iti Commission on Elections (COMELEC).
Sigun kenni Atty. Tabangin-Capuyan, mangipatungpal metlaeng dagitoy iti Commission on Elections checkpoints nga addaan panggep a mangsigurado a natalged ti maysa a lugar.
Kinuna ni Capuyan a nasken a dagiti personnel nga agimando kadagiti checkpoints ket nakauniporme, addaan iti nameplate, ken saan a nakakawes laeng iti pangsibilyan bayat ti operasyonda kadagiti checkpoints.
Adda met laeng ti makita a signboard iti checkpoint nga idadauloan iti inspector ken daytoy ket maipatungpal kadagiti “well-lighted area.”
Kagiddan dayta, inyunay-unay ni Atty. Tabangin-Capuyan a visual search laeng ti mabalin nga ipatungpal dagiti otoriad nu sadino saan a mabalin ti panagkapkap malaksid nu impaay ti motorista ti pammalubos daytoy.
Saan metlaeng a karaman ti panagkitada kadagiti Identification Card, driver’s license, Official Receipt (OR) wenno Certificate of Registration (CR) dagiti motorista.
Kabayatanna, saan laeng a maymaysa a lugar ti pakaisayangkatan ti checkpoint kasta met a pabaliw-baliw daytoy, nakadepende iti assessment dagiti kameng iti Philippine National Police.
Gapu iti dayta, makidkiddaw ti kooperasyon ti publiko seknan Comelec checkpoint.//Bombo Mera Pacpacan
