Epektibon ita nga aldaw ti “gun ban” wenno pannakaiparit iti panagaramat ti paltog iti Pilipinas gapu iti umadanin nga eleksion.
Ti gun ban ket mangrugi ita nga aldaw agingga Hunio a diez iti agdama nga addaan panggepn a mapababa ti election-related violence wenno krimen nga adda pakainaiganna iti eleksion.
Iti sidong ti Section 261 ti Omnibus Election Code, maiparit ti siasinoman nga indibidual nga agawit iti paltog iti ruar ti pagnanaedanna wenno lugar ti negosiona bayat ti panawen ti eleksion malaksid no autorisado ti Komision.
Bayat ti nasao nga aldaw, dagiti laeng kameng wenno opisial ti Philippine National Police (PNP), Armed Forces of the Philippines (AFP), ken dadduma pay nga ahensia a mangipapatungpal iti linteg ti mabalin nga agawit kadagiti paltog.
Malaksid iti dayta, dagiti sumaganad nga opisial ket naipaayan iti naan-anay a pannakawayawaya manipud iti pannakaiparit.
Dagiti sumaganad nga opisial ket naikkan iti naan-anay a pannakawayawaya manipud iti pannakaiparit a kas ti President, Vice President, Senate President, Senators, House Speaker, Members of the House of Representatives, Chief Justice ken Associate Justices of the Supreme Court, Cabinet Secretaries, Undersecretaries, Assistant Secretaries, ken dadduma pay nga opisial iti sidong ti Executive Branch, ken dadduma pay a nangangato nga opisial iti gobierno.
Mailaksid metlaeng iti pannakaiparit dagiti pribado nga indibidual iti sidong sumagmamano a kasasaad kas kadagiti cashiers ken disbursing officers ken dagiti tattao nga agaw-awit iti dakkel a gatad ti kuarta wenno napateg a banag.
