BAGUIO CITY – Nagserbi a dakkel a karit iti maysa a gwardiya ti panagsina dagiti nagannakna tapnu igaedna ti agadal agingga a nakaturpos iti Bachelor of Theology.
Segun iti 25-anyos a ni Sherwin Nitapa Pascio a tubo ti Ifugao, dakkel a banag ti panagsina dagiti nagannakna idi agtawen pay laeng daytoy iti sangapulo ket lima gapu iti nakaro a rigat a napasaran dagitoy.
Kinunana a saanna nga inleppas ti kurso nga HRM ken nangala iti kurso a Theology ngem nagsardeng daytoy ken nangala iti kurso a criminology ngem saanna nga inleppas ken intuloyna manen ti kurso a Theology.
Nupay kasta, gapu iti kinarigat ti biag ket nagduduma a part time jobs ti sinerrekna kas iti construction works, carpentry, gasoline boy ken panaggwardiya.
Kinunana a malaksid iti panagwardiyana iti rabii ket nagtrabaho pay daytoy kas gwardiya iti simrekanna a pagadalan tapnu adda magastosna iti panagadal daytoy.
Kalpasan ti pito a tawen a panagsalukagna ket nagturpos daytoy ken nagun-odna ti Best Field Trainee Award.
Binalakadanna met dagiti agtutubo a saanda nga agsardeng agingga a maragpatda dagiti arapaapda ken agtalekda a kanayun iti Namarsua.
Dinakamatna met a panggepna ti agala iti doctorate ngem iti agdama ket tututokanna ti panagtulong iti simbaan dagitoy ken ti panagtrabahona kas gwardiya.
Ni Pascio ket dua a tawen nga agserserbi kas gwardiya iti transmitter site ti Bombo Radyo Baguio.
