BAGUIO CITY – Naibalud ti maysa a security guard kalpasan ti maatap a panagtakaw daytoy iti kuarta iti maysa a bangko a masarakan sadiay Session Road, Baguio City.
Nabigbig daytoy a ni Jonathan Roxas, 39-anyos, naasawan ken residente ti Pacdal, Baguio City.
Nagserbi a complainant iti kaso da Maria Velencia Pinero, branch head ti nasao a bangko ken residente ti Leonila Hill, Baguio City ken ni Fe Dalupag, cash center head ti nasao a bangko ken residente ti San Fernando City, La Union.
Maibasar iti report, nagserbi ti suspek kas escort iti armored van a nakailuganan ti P8 million a maiturong iti nasao a bangko.
Nupay kasta, idi maserrek koman dagiti kuarta iti bangko ket naduktalan dagiti complainants nga P7 million laengen daytoy ken mapukpukaw ti P1 million.
Nagsubli dagiti complainant iti armored van ken nakitada dagiti naipaigid a naka-reppet a kuarta.
Nupay kasta, idi binilang dagiti complainant ti naipagid a kuarta ket P900,000 laengen daytoy ken mapukpukaw ti P100,000.
Iti panangkapkapda iti suspek ket naduktalan nga inbulsana ti P49,000 ken ti P51, 000 ket inkabilna iti side pocket ti pantalonna.
Naiturong ti suspek iti kustodia ti Baguio City Police Office Station 7 para iti pannakaipila ti kaso kontra kenkuana.
