BAGUIO CITY – Natiliw ti maysa a gwardiya gapu iti nagsaruno a panag-hold-up na iti dua a biktimana iti deppaar ti Camdas Subdivision ditoy Baguio City idi Dominggo, November 14, 2021.
Nabigbig daytoy a ni Danilo Balicag Langbay, 29-anyos ken residente ti Holy Ghost, Baguio City.
Immuna iti daytoy, maysa a balasang ti nagturong iti istasyon ti pulisya mainaig iti pananggandat ti suspek a mang-hold-up kenkuana iti nasurok 3:30 PM ti nasao nga aldaw iti deppaar ti Camdas Subdivision.
Iti imbestigasyon ti pulisya, magmagna ti biktima tapnu apan agibelleng ti basura idi nasabatna ti suspek a killaat a nangipaturong ti paltog kenkuana.
Indeklara ti suspek ti hold-up ngem nakataray ti biktima ken nagreport iti pulisya.
Dagus a nagresponde dagiti pulis a nagresulta iti panakatiliw ti suspek ken ti panakakumpiskar ti maysa a caliber .38 revolver a naglaon ti lima a bala malaksid pay iti innem a bala iti bag nga imet ti suspek.
Napaay ti suspek a mangiparang iti dokumento ti nasao a paltog.
Naduktalan pay nga iti agarup 3:30PM ti kapada nga aldaw ken lugar biniktima ti suspek ti maysa a 15-anyos nga estudyante.
Iti reklamo ti barito, paawid daytoy idi nasabatna ti suspek a killaat a nangbangen iti dalan ken nangtutuk kenkuana ti paltog.
Imbilin ti suspek ti panangited kenkuana ti biktima iti cellphone daytoy.
Gapu iti buteng ti barito, intedna ti cellphone-na nga aggatad ti P15,000.
Positibo met a binigbig ti barito a ni Langbay ti nang-hold-up kenkuana.
Narekober pay manipud iti suspek ti cellphone ti biktima.
Iti agdama, sumangsango ti natiliw a gwardia iti kaso a dua a bilang ti robbery with intimidation.
