BAGUIO CITY – Agtultuloy ti panakasapol ti mapukpukaw a barangay secretary ti Barangay Bedbed, iti munisipyo ti Mankayan, probinsia ti Benguet a mapapati a nairaman iti nargaay a paset ti bantay sadiay Sitio Lepa-ak, Bedbed idi kalman.
Nabigbig daytoy a ni Luvina Julian Kidkid, 32-anyos ken residente ti Bedbed, Mankayan, Benguet.
Iti panakiyuman ti Bombo Radyo Baguio kenni PO3 Dexter Ramirez ti Mankayan PNP, posible a nagaburan ken nairaman ti nasao a barangay secretary iti nargaay a paset ti bantay sadiay.
Kinunana a manarimaan ti panagdalus dagiti residente iti kalsada sadiay idi killaat a nargaay ti paset a daldalusan dagitoy.
Dinakamatna a nakataray amin dagiti agdaldalus ngem saandan a nakita ti nasao a barangay secretary.
Innayonna nga agala laeng kuma ti nasao a barangay secretary iti attendance dagiti agdaldalus sadiay.
