Saan a kumpiansa ni sigud a presidential spokesperson Harry Roque nga awaten ti Marcos administration ni sigud a president Rodrigo Duterte kaspangarigan mapatgan ti interim release daytoy.
Iti maysa a live video broadcast, kinuna ni Atty. Roque a kaspangarigan awaten iti administrasyon ni sigud a presidente, posible a makiddaw a kasukat daytoy ti panagretiro dagiti amin a Duterte manipod iti pulitika.
Ti komento daytoy ket kasaruno ti panagkiddaw iti legal counsel ni FPRRD a ni Nicholas Kaufman a patgan iti Marcos administration ti sigud a presidente a makaawid iti Pilipinas kaspangarigan umannugot ti International Criminal Court (ICC) iti interim release.
Makidkiddaw daytoy gapu ta sigun iti nasao a legal counsel, kumarkaron ti saan a nasayaat a kasasaad iti salun-at ni FPRRD.
Iti baet dayta, kumpiansa latta ni Atty. Roque nga adu pay a pagilian ti nakasagana nga umawat iti sigud a presidente kas iti Belgium ken Japan.
