BAGUIO CITY – Sinuratan ti lokal a gobyerno ti La Trinidad, Benguet ti hauler ti basura ti siudad ti Baguio a mangar-aramat iti maysa a disso sadiay Lamtang, Puguis kas transfer wenno staging area dagiti basura.
Sigun kenni Mayor Romeo Salda, nalawag iti kontrata nga agingga laeng idi December 31, 2017 ti panagaramat ti nasao a hauler iti transfer area para kadagiti ak-akupenda a basura ti siudad ti Baguio.
Impettengna nga awan ti naipaay a pawayway iti nasao a hauler para iti nailaylayon a panagaramatna iti nasao a disso nangruna ta saan a napatgan iti korte ti kiddaw ti hauler nga extension iti panagtalinaedda sadiay.
Innayonna a nasken laeng a sumurot ti nasao a hauler iti nakalanad iti nasao a kontrata.
Tinakderanna pay a saanda a patgan ti panakailaylayon ti panagaramat ti hauler iti nasao a disso kas staging area dagiti basura isut gapuna a kasapulanen nga agakar ti nasao a garbage collector.
Naamuan nga iti inspeksion ti Environmental Management Bureau idi napalabas a Miyerkoles ket nakitada a maar-aramat latta ti nasao a disso sadiay Lamtang, Puguis kas transfer area dagiti basura ti siudad ti Baguio.
Maipalagip nga idi napalabas a tawen ket nagreklamo dagiti residente sadiay gapu iti nabangsit nga angin nga agtataud iti nasao a transfer area a posible a maka-apektar iti salun-atda nangruna kadagiti ubbing iti kaasideg daytoy a pagadalan.
