BAGUIO CITY – Manarimaan pay laeng ti imbestigasyon dagiti otoridad iti panakapabettak ti Hedcor Tapping Point sadiay Otucan Norte, Bauko idi rabii.
Iti ekslusibo a panakiuman ti Bombo Radyo kenni PCI Bernard Wong, deputy police community relations officer ti Mt. Province Police Provincial Office, kinunana a sangapulo nga armado a lallaki a maatap a kameng ti New People’s Army ti rimmaut iti nasao a tapping point.
Kinunana a kinillaat dagiti suspek ti dua a gwardiya ken kinumpiskar dagitoy ti dua a 9mm pistol a service firearm dagitoy.
Innayunna a nangimula dagiti suspek iti mapapati nga improvised explosive device a pinabettakda kabayatan ti panaglibas dagitoy paturong iti kabambantayan a paset ti probinsya.
Dagus met a nagresponde dagiti kameng ti pulisya, dagiti opisyales ti barangay ken ti BFP tapnu masebseban ti uram.
Ti nasao nga insidente ket nangitunda iti panakapukaw ti suplay ti kuryente iti intero a Mountain Province manipud alas-10 ti rabii agingga idi alas nuebe trenta ti agsapa.
Dinakamatna a kinordon ti pulisya ti nasao a disso ken nagturong metten sadiay dagiti kameng ti scene of the crime operatives ken ti Explosive Ordnance Division ti Police Regional Office Cordillera tapnu iprosesoda ti nasao nga insidente.