BAGUIO CITY – Nakemmeg ti maysa a helper gapu iti panangbagbagsolna iti katrabahuanna iti maysa a palay buying station sadiay Bulanao Norte, Tabuk City, Kalinga.
Nabigbig ti suspek a ni Marlon Flores, 33-anyos bayat a nabigbig ti biktima a ni Jesus Dumasig, 50-anyos.
Maibasar iti report, napan ti nabartek a suspek iti pagturturoganda iti nasao a palay buying station.
Riniingna ti matmaturog a biktima a nangitunda tapnu masuron ti biktima a nagresulta iti panagsinnungbat ken panagdinnanog dagitoy.
Sigun kadagiti testigo, napan ti suspek iti kusina ken nagala ti natadem nga igam sakbayna a binagbagsol ti biktima.
Nagsagrap ti biktima iti dua a bagsol iti baba ti kilikilina ken dagus daytoy a naitaray iti pagagasan bayat a kinemmeg dagiti pulis ti nasao a suspek.
