Inakusaran ti hepe ti United Nation Human rights dagiti rebelde a supsuportaran ti Rwanda a nangsakup iti maikadua a kangrunaan a siudad iti makindaya a Democratic Republic of Congo (DRC) a nangpapatay kadagiti ubbing ken nangraut kadagiti ospital ken bodega a pagidulinan iti humanitarian aid.
Sigun kenni Volker Türk, kinumpirmar ti opisinana ti “summary execution” dagiti ubbing babaen ti bunggoy ti M23 kalpasan a simrekda iti siudad ti Bukavu idi napalabas a lawas, ken naamuanda nga adda igam dagiti ubbing.
Immunan nga inakusaran metlaeng ni Turk ti Congolese government forces ken dagiti rebelde a mangrekrekrut kadagiti ubbing.
Ita laeng a bulan, nangiyuswat ti komision a mangimbestigar ti kinaranggas, agraman dagiti panangrames ken panangpapatay nga umasping kadagiti “summary executions” nga inaramid ti agsumbangir a dasig sipud pay idi rugi ti tawen.
Maipalagip nga itay laeng nabiit, sinakup dagiti rebelde ti M23 ti Bukavu, maysa a siudad nga addaan iti 1.3 milion a tattao, kalpasan a sinakupda ti Goma, 101 kilometro iti amianan , idi napalabas a bulan.
Agarup a 3,000 ti naipadamag a pimmusay ken rinibribu ti pimmanaw iti nasao a lugar gapu iti panagsusupiat a napasamak idiay Goma.
Ti M23 ket kalatakan kadagiti nasurok a 100 nga armado a grupo a makisalsalisal para iti panagkontrol ti tinirtrilion a dolyar a kinabaknang ti mineral idiay DRC.
Dagiti rebelde ket supsuportaran ti agarup 4,000 a grupo wenno tattao manipud iti kabangibang a Rwanda, sigun kadagiti eksperto ti UN.
