BAGUIO CITY – Natiliwen ti High Value Individual a nanggandat a mangiserrek iti iligal a droga sadiay Baguio City Jail – Male Dormitory babaen iti adobo ken bakareta.
Nabigbig daytoy a ni Jhon Raymond Cariño Pinto a mabigbigbig metlaeng iti nagan a Michael Aldawood ken residente ti Brookside, Baguio City.
Natiliw daytoy iti naisayangkat a buy-bust operation idi rabii sadiay Brookside.
Nakumpiskar kenkuana ti tallo a pakete ti mapapati a shabu nga agdagsen ti agarup nasurok innem a gramo, ti cellphone-na ken ti naaramat a buy-bust money.
Maipalagip nga idi February 12 ti agdama a tawen ket nadiskobre dagiti jail officers ti 10 a pakete ti mapapati a shabu a naiseksek iti sumagmamano a karne iti bakareta ken adobo nga inserrek ni Pinto iti Baguio City Jail – Male Dormitory.
Kabayatan ti panangsukimat dagiti jail officers kadagiti karne ket killaat a timmaray ni Pinto ken saanen daytoy a nakamatan dagiti dadduma pay a jail officers.
Naduktalan a ti umawat kuma kadagiti kontrabando ket ti nakabaluden a mabigbigbig a maikawalo a top drug personality iti entero a Cordilera Region a ni Jeffrey Pascua Tolentino nga immunan a natiliw iti buy-bust operation a nagresulta iti shootout ditoy metlaeng Baguio City idi August 28, 2020.
Iti agdama, sumango ni Pinto iti kaso a panaglabsing iti Comprehensive Dangerous Drugs Act of 2002.
