BAGUIO CITY – Immado ita dagiti hikers nga agturturong sadiay munisipyo ti Kibungan, Benguet kasaruno ti panakauram ti Mt. Pulag sadiay Kabayan, Benguet.
Sigun kenni Municipal Tourism Officer Charo Solimen, manipud nauram ken naipawil ti panagsang-at dagiti turista iti Peak No. 2 ti Mt. Pulag ket adun dagiti baro a hikers a nagpa-book kadakuada para iti panakipaset dagitoy iti dua nga aldaw a hiking activity sadiay a naawagan ti Kibungan Circuit.
Kinunana a dumanon ita iti 9 agingga 12 a grupo ti agpalpalista kadagitoy tunggal weekends sipud pay umuna a lawas ti Enero.
Innayonna a gapu iti napasamak iti Mt. Pulag ket naipalagip met kadakuada ti panagbalinda nga alerto tapnu mabantayan dagiti turista ken dagiti bantay sadiay.
Kinunana a saanda met a mabalin nga ipawil ti panagluto dagiti turista nangruna ta dua agingga tallo nga aldaw ti panag-camping dagitoy.
Kabayatanna, dumanon iti 12 a grupo dagiti hikers ti naituding nga ag-trekking iti kabambantayan ti Kibungan inton February 16 agingga 18.
Dinakamat ni Solimen a kadawyan a taga-Manila ti makipaset iti nasao a trekking.
Kabayatanna, panggepda met nga inton Mayo a maisayangkat ti tinawen nga invitational climb sadiay.
