BAGUIO CITY – Agwarwaras ita iti social media ti maysa a text message mainaig iti terror threat iti Baguio City ken La Trinidad, Benguet a maibagbaga a nagtaud iti Bombo Radyo.
Iti screenshot ti text message nga agwarwaras iti facebook, nakalanad a naka-red alert ti Baguio ken La Trinidad, ken naballaagan dagiti umili a lumiklik iti panagturongda sadiay SM ken iti dadduma pay a natatao a lugar.
Nakalanad pay iti mensahe a positibo nga adda kadagiti nasao a lugar dagiti Abu Sayyaf ken NPA, ken nadakamat pay ti pananguram dagiti maatap a kameng ti NPA iti dua a bus sadiay Philex.
Ti mensahe kanu ket manipud iti PMA ken ti source dagitoy ket ti Bombo Radyo a naidalan iti PIA.
Nupay kasta, linawlawagan ti Bombo Radyo ti nasao nga isyu.
Dagiti damdamag ti Bombo Radyo mainaig iti pangta ti NPA ken Abu Sayyaf ket nalawag a makita iti website ti Bombo Radyo Philippines ken official facebook page ti Bombo Radyo Baguio.
Immunan nga impadamag ti Bombo Radyo a hoax wenno saan a pudno ti pangta ti ASG a panangbomba iti SM ken ti panangilawlawag ket nagtaud a mismo iti maseknan a mall ken iti PNP Cordillera.
Kabayatanna, nalawag pay iti website ken facebook page ti Bombo Radyo Baguio ti mainaig iti panakauram ti dua a truck ti Philex Mining Company, saan ket a bus a kas iti nakalanad iti agwarwaras a mensahe iti social media.
