BAGUIO CITY – Posible a home isolation ti isingasing ken isayangkat ti provincial government ti Benguet iti kanito nga umado pay ti kaso ti COVID-19 a mailista ti probinsia.
Kinuna ni Governor Melchor Diclas a daytoy ket gaputa napunnon dagiti naisagana nga isolation facilities ti probinsia nga intunda ti killaat a panagadu dagiti nagpositibo iti COVID-19 iti sumagmamano a munisipyo.
Kinunana a maiyaplikar ti nasao a home isolation kadagiti asymptomatic wenno dagiti pasyente a nagpositibo iti coronavirus ngem saan a makarikrikna iti aniaman a sintomas.
Sigun kenkuana, ita ket ti paylaeng Tuba, La Trinidad ken Itogon ti addaan ti bukod nga isolation facilities ngem napuno metlaengen bayat a manarimaan paylaeng ti panakaibangon ti isolation facility ti Tublay.
Kinunana a napintas ti nagbalin a resulta ti naisayangkat a mass testing kadagiti munisipyo ti Benguet a nakailista iti adu a kaso ti COVID-19 ngem inaklonna met a parikot dagiti quarantine facilities a pakaiturungan dagiti maduktalan nga agpositibo iti virus.
Kabayatanna, dinakamat met ni La Trinidad Mayor Romeo Salda a saandan nga aggawat kadagiti COVID positive patients manipud iti dadduma a munisipyo gaputa mapunpuno metten dagiti pasilidadda.
Agtultuloy met latta ti panangipalagip dagiti otoridad iti panagtungpal dagiti umili kadagiti amin a pagalagadan tapnu maliklikan ti ad-adda a panakaiwaras ti coronavirus iti probinsia.
Iti agdama ket nasuroken iti 1,000 ti pakabuklan a kaso ti COVID-49 iti Benguet a bukbuklen ti 485 a naimbagan, 528 nga aktibo a kaso ken 13 nga ipupusay.