BAGUIO CITY – Manarimaan ti hot pursuit operation nga ipatpatungpal ti nagtipon a puersa ti Buguias Municipal Police Station, Benguet Provincial Public Safety Company ken Regional Public Safety Battalion kontra kadagiti kameng ti New People’s Army a nang-harass iti maysa a pulis sadiay Loo, Buguias, Benguet idi rabii.
Iti panakiuman ti Bombo Radyo kenni PCI Peter Daplian, hepe ti Buguias PNP, kinunana kalkalpas ti panagpatrolya ni SPO1 Leonardo Kalos ken dagiti uppat a barangay tanods ken idi asidegdan iti tanod outpost ket hinarang dagitoy ti nasurok sangapulo nga armado a lallaki.
Tinutukan dagitoy dagiti suspek iti paltog sakbay nga inalada ti pitaka ni SPO1 Kalos a naglaon iti IDs ken P15, 000 a cash, 9MM issued pistol, ken uppat a magazine a naglaon iti pakabuklan nga innem a pulo ket maysa a bala.
Saanda met nga inan-ano ti nasao a pulis ken dagiti tanods, ken posible a nagturongda iti paset ti Kabayan, Benguet wenno Tinoc, Ifugao.
Binalakadan met ni PCI Daplian dagiti residente iti masakopanna a lugar a saanda nga agdanag gaputa agtintinnulong dagiti maseknan a municipal police stations tapnu maipanamnama ti kinatalged iti lugar dagitoy.
Kabayatanna, inaklon ti NPA iti sidong ti Jennifer Cariño Command-NPA-Benguet a dagitoy ti responsable iti nasao a panagraut.
Iti ekslusibo a panakiuman ti Bombo Radyo kenni Ka Greg, kumander ti Jennifer Cariño Command, kinunana nga inalada ti maysa a 9mm bereta firearm nga addaan iti uppat a magazine, maysa nga M14 magazine, maysa a hand grenade, holsters, pouch, dua a VHF radios, ken military uniforms.
Kinunana nga inaramidda ti nasao a panagraut kas pannusa iti krimen nga ar-aramiden ti pulisya kadagiti tattao ken iti revolutionary movement.
Inakusaran pay ti komunista a grupo dagiti pulis ti Buguias nga agkikikil kadagiti agideldeliber iti nateng ken dadduma pay nga iligal nga aktibidad.
Impettengna pay a saanda nga agal-ala iti personal a kagawaan ken ti al-alaenda laeng ket dagiti kagawaan nga impaay ti gobyerno.
Nagballaag ti Jennifer Cariño Command nga agtultuloy ti addang ti NPA kontra iti PNP, AFP ken iti dadduma pay a target dagitoy agingga a magun-odda ti balligi iti isaksakadda a national democratic revolution.
