BAGUIO CITY – Bassit laengen dagiti nabatbati a silid kadagiti hotels ken dadduma pay nga accomodations iti siudad ti baguio.
Iti panakiyuman ti Bombo Radyo kenni Andrew Pinero, panakangiwat ti Hotel and Restaurant Association of Baguio, kinunana a naragsak unay ita ti hospitality industry gapu kadagiti bookings a naaw-awat dagitoy.
Kinunana a no adda man dagiti nabatbati a mabalin nga abangan dagiti turista nga agturong ditoy siudad ket bassit laengen.
Dinakamatna a fully booked ita dagiti hotels ken dadduma pay nga accomodations para iti 2018 PMA Alumni Homecoming gapu iti kaadu dagiti dumar-ay iti nasao nga aktibidad malaksid pay iti Chinese New Year ken ti Valentine’s Day.
Innayonna nga isagsagana metten dagiti accomodations establishments ti bukod dagitoy a ‘gimik’ ken promos tapnu ad-adda a maguyugoy dagiti turista ken dagiti taga-Baguio City nga agturong kadagitoy.
Kabayatanna, kinunana a kasapulan nga adda ti programa a buklen ti lokal a gobyerno ti Baguio City ken ti pribado a sektor a mangrisut wenno mang-mitigate kadagiti parikut a sangsangwen ti siudad tunggal dumteng dagiti dadakkel nga aktibidad kas iti Panagbenga.
Dinakamatna a mapaspasaran ti kinailet iti trapiko tunggal adda dagiti aktibidad iti siudad ken tunggal weekend ken daytoy a senaryo ket maysa a reyalidad.
Gapu iti daytoy, kinunana a kasapulan a mapasayaat ti transport system ti siudad tapnu maguyugoy dagiti turista a mangaramat kadagitoy ken saandan nga agitugot iti bukodda a lugan.
Nupay kasta, kinunana a nasken met a maipasigurado a saan a marigatan dagiti umili iti siudad, nangruna iti panaglugan dagitoy kadagiti jeep wenno taxi.
Impettengna a kasapulan ti nainget a panagadal iti nasao a banag babaen iti panakibinnadang ti gobyerno iti pribado a sektor tapnu mabukelda ti kasayaatan a solosyon, partikular dagiti long-term programs a mangrisut iti parikut.
Insingasingna pay ti panakaikonsidera ti panakailukat dagiti ad-adu nga access roads.
