Manamnama nga agbotos ti House Justice Committee no adda ti umdas a “probable cause” para iti impeachment ni Vice President Sara Duterte ita nga aldaw.
Sigun kenni House Justice Committee Chairperson ken 2nd District Batangas Rep. Gerville Luistro, adda ti napateg nga isyu a kasapulan a mapagsasaritaan sakbay ti panagbotos.
Daytoy ket pakairamanan ti income tax returns da Sara Duterte ken asawana a ni Manases Carpio; kasta met dagiti mapapati a pangta ti Bise Presidente kontra kenni President Ferdinand Marcos Jr.
Karaman kadagiti nataktak a saritaan ti maipapan iti green box nga insubmitir ti Bureau of Internal Revenue (BIR).
Nataktak daytoy gapu iti palagip ti ahensia a saan a mabalin a malukatan iti open session ken rumbeng laeng a mapagsasaritaan iti closed-door meeting no daytoy ket aid of legislation.
