Inyebkas ni House Speaker Faustino “Bojie” G. Dy III ti pannakipagriknana iti pamilya ti dua nga estudyante a pimmusay idiay Cauayan South Central School, Isabela kalpasan a nakuryente dagitoy iti maysa a fun run activity.
Personal a nagturong ni Dy iti pagadalan apaman a naipadamag ti insidente tapno ammuen ti sitwasyon ken makasaritana dagiti otoridad.
Maipalagip a naipadamag a dua nga estudyante ti pimmusay kalpasan a nakuryente kabayatan iti naisayangkat a fun run iti nadakamat a pagadalan bayat a dua pay nga indibidual ti naipadamag a nadangran idi kalman, Oktobre 3 no sadino maysa ti agtultuloy a maobobserbaran iti pagagasan ken nadischarge metten ti maysa a biktima.
Agtultuloy met ti imbestigasyon dagiti otoridad seknan iti napasamak nga insidente.
