Impaganetget ni House Speaker Martin Romualdez a kasapulan a raemen ti Association of Southeast Asian Nations (ASEAN) – China Code of Conduct (COC) ti soberania ti amin a naapektaran a pagilian kagiddaan ti pannakipaset ti Pilipinas iti Manila Dialogue on the South China Sea.
Nakalanad iti website a ti tinnawen a Manila Dialogue on the South China Sea ket nakapokus iti panagtulnog ti international law para kadagiti pagilian a karaman iti aglawlaw iti South China Sea, kasta metten ti kaasitgan a pagilian.
Malaksid iti Pilipinas, karaman iti nasao a panagtaripnong ti China, Indonesia, Malaysia, Singapore, Vietnam, Estados Unidos, ken United Kingdom.
Immunan nga indagadag ni President Ferdinand Marcos Jr. kadagiti miembro ti Association of Southeast Asian Nations (ASEAN) a partakanda ti panangipasa ti code of conduct tapno agtultuloy ti panagrang-ay ti nagduduma a pagilian.
Ti Manila Dialogue on the South China Sea ket naipatungpal idi Nobiembre sais ken agleppas daytoy inton bigat, Nobiembre a otso.
