BAGUIO CITY – Naipadanun kenni Presidente Rodrigo Duterte ti pakaseknan dagiti umili iti aglawlaw ti maar-aramid a housing project sadiay Buyagan, La Trinidad, Benguet.
Naipatulodan iti kopya ti nasao a surat ti opisina ni Mayor Romeo Salda ken iti Sangguniang Bayan ti munisipyo.
Nailanad iti surat a gapu iti nasao a proyekto ket dakkel ti nagbalin nga epekto ti Bagyo nga Ompong sadiay Buyagan, ken sadiay Sitio Kesbeng ti Barangay Bineng.
Impeksa dagiti umili ti amakda a maapektaran manen ti watershed wenno ti pagtataudan ti suplay ti barangayda iti danum.
Gapu iti daytoy, kiniddawda ti panakaisayangkat ti addang tapnu maibilin nga amin a land developers ket nainget nga agtungpal kadagiti pagalagadan ken linteg.
Kabayatanna, nakaawat ti lokal a gobyerno ti La Trinidad iti surat manipud kenni Bineng Punong Barangay Patricio Wakat a nakailanadan ti panaka-apektar ti La Trinidad Capitol-Bineng Provincial Road saday Sitio Lower Kesbeng, Bineng gapu iti nasao a housing project nangruna iti napalabas a bagyo.
Maipalagip nga innem a daras a naipasardeng ti nasao a proyekto iti napalabas nga administrasyon bayat nga ita ket adda manen ti maipil-pila a ‘cease and desist order’ iti nasao a patrabaho.
