BAGUIO CITY – Nabutngan ken arigna maulaw dagiti kakailyan a Pinoy sadiay Taiwan kabayatan ti panagdayeg ti magnitude 6.7 a ginginaed sadiay iti pasado ala una ti malem idi kalman, April 18.
Iti panakiyuman ti Bombo Radyo Baguio kenni Madonna Wailan manipud Kalinga ken factory worker sadiay Hsinchu, Taiwan, inladawanna a maka-ulaw ti napasamak a gingined.
Kinunana a gapu iti kapigsa ti gingined ket nga arigna nag-indayon ti kompanya nga ayanda ken nagresulta pay daytoy iti panakariing dagiti ka-dormitoryo dagitoy.
Dinakamatna nga adayo dagitoy iti sentro ti gingined a nailista sadiay Hualien ngem napigsa latta ti nariknada a gingined.
Imbingay met ti maysa a Pinay a naki-asawa sadiay nga arigna mai-in-indayon ti balayna a nagresulta iti panagpukpukkawna ken iti panagtarayda a pamilya paruar iti balayda.
Sigun pay kadagiti kailyan a Pinoy sadiay Taiwan, narikna dagitoy ti gingined ngem uray arigna matumba dagiti pasdek iti ayanda ket natalged latta dagitoy iti baet a nakariknada iti nakaro a panagbuteng.
Immuna a naipadamag a magnitude 6.1 ti gingined a dinmayeg sadiay Taiwan no sadino, ti sentro daytoy ket iti asideg ti Hualien ken narikna ti epekto daytoy iti dadduma a paset ti Taiwan, Pilipinas ken Japan.
