BAGUIO CITY-Indeklara ti Office of the President nga ‘special non-working holiday’ iti Cordillera ti July 15, aldaw ti Sabado gapu iti panakarambak ti maika-30 a Foundation Anniversary ti rehion.
Nailanad iti Proclamation No. 247 a pinirmaan ni Executive Secretary Salvador Medialdea a maiparbeng laeng a maipaayan iti oportunidad dagiti umili ti rehion Cordillera a mangrambak ken makipaset iti okasyon babaen iti seremonya.
Immuna metten a pinagsaganaan ti probinsia ti Benguet a host local government ken ti National Commission on Indigenous Peoples (NCIP)-Cordillera a host agency ti programa para iti Cordillera Day inton bigat, aldaw ti Sabado a maangay sadiay Wangal Sports Complex, La Trinidad, Benguet.
Manamnama a pasetan daytoy dagiti delegasyon manipud iti amin a probinsia iti rehion, pakairamanan dagiti delegasyon ti siudad ti Baguio ken Tabuk City ken marugian babaen iti parada manipud Benguet Provincial Capital agingga iti sports complex para iti main program.
Maipalagip nga impaulog daydi President Corazon Aquino ti Executive Order No. 220 idi July 15, 1987 a nangbukel iti Cordillera Administrative Region nga addaan innem a probinsia ken maysa a siudad.
Addaan tema a “CAR@30: A Celebration of Cordillera Unity” ti selebrasyon ti Cordillera Month ita a tawen ken kangrunaan a panggep daytoy ket ti panakaisakad ti kiddaw manen nga otonomiya.
