BAGUIO CITY – Natiliw ti maysa a High Value Individual (HVI) iti iligal a droga bayat a nakalibas ti dua pay nga indibidual iti nagsisina nga implementasyon ti search warrant operations sadiay Tabuk, City, Kalinga idi kalman.
Nabigbig ti natiliw nga HVI a Ricky Alunday Balway, 30-anyos ken residente ti Lacnog, Tabuk, City, Kalinga.
Nakumpiskar iti pagtaenganna ti 21 a pakete ti maatap a shabu nga agdagsen ti agarup nasurok lima a gramo.
Inyemplementar metlaeng dagiti otoridad ti search warrant iti pagtaengan ti target person a ni Benny Alluyon Aboli sadiay Nambaran, Tabuk City, Kalinga a nagresulta iti panakakumpiskar ti 20 a pakete ti maatap a shabu nga agdagsen ti agarup nasurok dua a gramo ken nagduduma nga illegal drug paraphernalia.
Inyemplementar pay dagiti otoridad ti search warrant iti pagtaengan sadiay Lacnog, Tabuk City, Kalinga kontra iti managan Hyker Wacnang Tayab a nakakumpiskaran ti 23 a pakete ti maatap a shabu nga agdagsen ti agarup nasurok dua a gramo.
Nupay kasta, agpada a saan a nadanunan dagiti otoridad da Aboli ken Tayab.
