BAGUIO CITY – Dumanonen iti 52 dagiti nabigbig a clusters wenno grupo a nakailistaan dagiti kaso ti COVID-19 ditoy Baguio City.
Sigun kenni City Health Services Officer Dr. Rowena Galpo, dagiti nasao a clusters ket dagiti pagtaengan, bangko, grocery stores, government offices, iti merkado publiko, dagiti religious people, dagiti police personnel ken health workers malaksid pay kadagiti dimmar-ay iti birthday parties.
Innayonna nga adda ti local transmission ti coronavirus ditoy Baguio gaputa 85 percent kadagiti nakumpirmar a kaso ti COVID-19 ket bin-ig nga awanan ti travel history iti ruar ti siudad.
Gapu iti daytoy, manarimaan ti panangipatungpal ti lokal a gobyerno ti Baguio iti four-pillar strategy kontra iti COVID-19 a bukbuklen ti contact tracing, COVID testing, isolation ken treatment.
Kinunana a dimmanon metten iti 34,000 nga indibidual ditoy siudad ti naipasidong iti Reverse Transcription-Polymerase Chain React Test bayat a 9,000 ti naipasidong iti Rapid Diagnostic Tests.
Impanakkelna a nagresulta iti 43 percent ti pakabuklan a kaso ti COVID-19 ditoy Baguio ti contact tracing efforts ti lokal a gobyerno ti siudad bayat a nagresulta met iti 34 percent ti pakabuklan a kaso ti expanded-targeted testing kadagiti sektor a narisgo iti nasao a sakit.
Iti agdama, 22 a bunggoy ti mangbukbukel iti contact tracing force ti Baguio City a bukbuklen ti dumanon 600 nga indibidual ken daytoy ket katukad ti efficiency rate a 1:37 wenno maysa a contact tracer iti tunggal 37 nga indibidual.
