Naisayangkat ti Information, Education, and Communication (IEC) Campaign on Hazardous Waste Management iti opisina ti City Disaster Risk Reduction and Management Office (CDRRMO) iti siudad ti Baguio ita nga aldaw, Okt. 14, 2026.
Ti nasao nga aktibidad ket pinasetan dagiti nasurok 50 a barangay officials ken dagiti pannakabagi dagiti small business establishments manipud kadagiti barangay iti ruar ti Central Business District (CBD) iti siudad.
Panggep ti seminar a mangipaay iti umno a pannakaammo ken pannakaawat dagiti participants maipanggep iti nasayaat ken natalged a panangimanehar kadagiti hazardous waste, kas iti used cooking oil, industrial oil, grease waste, ken electronic waste wenno e-waste.
Babaen iti daytoy nga aktibidad, panggep met ti City Environment and Parks Management Office (CEPMO) a mapapigsa ti pannakaipatungpal dagiti pagalagadan ti Department of Environment and Natural Resources (DENR) mainaig iti hazardous waste management, tapno mapabassit dagiti peggad maited dagitoy iti aglawlaw ken iti salun-at ti publiko.
Sigun kenni Engr. Marivic Empizo, Assistant City Environment and Parks Management Officer, napateg ti umno a panangtaripato, panangisimpa, ken panangiturong kadagiti hazardous waste tapno masigurado a saan a mangpataud dagiti kemikal a linaon dagitoy iti peggad iti aglawlaw ken iti salun-at dagiti tattao.
Inlawlawagna a masapul a maamuan dagiti barangay officials ken dagiti small business owners dagiti umno a pamay-an iti panangimanehar kadagiti hazardous waste, nangruna iti panangliklik iti pannakaibelleng dagitoy iti kanal, karayan, ken dadduma pay a lugar.
Babaen iti nasao a kampanya, namnamaen ti CEPMO a mapapigsa ti partisipasyon dagiti barangay ken negosiante iti panangsalaknib iti aglawlaw babaen iti responsable a panangimanehar kadagiti hazardous waste.
Kabayatanna, nagpalagip dagitoy iti publiko a saanda nga iraman dagiti hazardous waste iti regular a basura. //Bombo Khey Reparip
