BAGUIO CITY – Isayangkat ti lokal a gobyerno ti Baguio ti information education campaign seknan iti COVID-19 vaccines ken ti maitulong daytoy kadagiti tattao kas paset ti panagsagana ti siudad iti mass vaccination kontra iti COVID-19.
Sigun kenni Mayor Benjamin Magalong, nasken a mailawlawag ken maipaka-awat kadagiti umili ti kinapateg ti panagpabakuna kontra iti COVID-19.
Kinunana nga umdas ti bulan ti Enero agingga iti Marso a pakaisayangkatan ti information education campaign bayat a saan pay a nakasangpet ditoy siudad dagiti bakuna kontra iti COVID-19.
Dinakamatna a napateg ti information education campaign seknan iti COVID-19 vaccines gaputa adda latta dagiti umili nga agduadua wenno madanagan nga agpabakuna.
Immunan nga imbinglay ti mayor a 386,000 doses ti COVID-19 vaccine ti ginatang ti city government manipud iti pharmaceutical company nga AstraZeneca ken manamnama nga iti katengngaan ti agdama a tawen a sumangpet iti siudad ti umuna a batch ti nasao a bakuna.
