BAGUIO CITY–Kinasuan ti Office of the Ombudsman ni Ifugao Representative Teodoro “Teddy” Baguilat Jr. gapu iti panakagatang ti maatap nga overpriced a second-hand a lugan nga aggatad ti P900,000 bayat ti terminona kas gobernador ti probinsia idi 2003.
Nabigbig kas co-accused ni Baguilat iti kaso a graft da sigud a provincial budget officer Virginia Farro, sigud a provincial treasurer Samuel Marinay ken ti private respondent a ni Jose Man Singh, agtagikua iti JMS General Merchandise.
Maibasar iti charge sheet, gimmatang iti second-hand a wagon trooper manipud iti nasao a merchandize iti gatad a P900,000 ti provincial government ti Ifugao idi ni Baguilat paylaeng ti gobernador idi March 2003.
Nailanad a nakikomplot ni Baguilat kada Farro ken Marinay tapnu maipaay ti pabor kenni Singh ken awan ti naipatungpal a competitive public bidding a sagudayen ti linteg.
Nailanad pay nga awan ti proper budget appropriation iti panakagatang ti nasao a lugan ken maatap a naaramid ti Deed of Sale ti lugan sakbay pay a naisagana ti purchase request, canvass report ken ti panakaipaay ti purchase order.
Nakasuan pay ni Baguilat iti maysa a panaglabsing iti nasao a linteg gapu ta ti panakagatang ti maatap nga overpriced a lugan ket nangitunda iti damage ken prejudice iti probinsia ti Ifugao.
Inrekomendar ti Ombudsman ti P60,000 a piyansa ni Baguilat bayat a P30,000 ti piyansa dagiti co-accused daytoy.
Kinumpirmar met ni Baguilat a naawatnan ti kopya ti case information sheets nga impila ti Ombudsman ngem agtalek daytoy a mapaneknekan ti kina-inosentena iti korte.
