BAGUIO CITY – Maitampok ti Igorot mix martial artist a ni Geje “Gravity” Eustaquio iti main event ti ONE: Total Victory sadiay Jakarta Convention Center, Indonesia inton September 16.
Sigun iti ONE Championship, makasango ni Eustaquio ti sigud nga ONE Flyweight World Champion a ni Kairat “The Kazakh” Akhmetov ti Kazakhstan.
Ti 29-anyos a ni Akhmetov ket maysa a beterano a martial artist nga addaan ti professional record a 23 wins, 1 loss ken nabileg daytoy iti wrestling ken striking.
Naudi a naabak daytoy iti labanda kenni Adriano Moraes para iti titulo ti ONE Flyweight World Champion babaen iti unanimous decision ken gandatenna manen a subboten ti kampeonato babaen iti pananglabanna kenni Eustaquio iti cage.
Sigun met kenni Eustaquio, babaen iti panagsangoda iti sigud a world champion ket maipakitana dagiti kasayaatan nga skills-na ken iyawidna ti pangabak para iti Pilipinas.
Ti Igorot fighter ket maysa kadagiti mabigbigbig a most skilled martial artists iti Asya gapu iti solido nga striking ken grappling skill daytoy ken iti kaudianna a labanna ket nangabak daytoy kontra kenni Anatpong Bunrad babaen ti split decision iti rematch dagitoy.
