BAGUIO CITY – Nalaud ita ti panagliday ti pamilya Tegwa kalpasan a naidanon kadakuada ti nakas-ang a damag a pimmusay ni Igorot government trooper Daniel Tegwa iti agtultuloy a riribok sadiay Marawi City.
Iti panakiuman ti Bombo Radyo kenni Robely Tegwa, asawa ti pimmusay a SAF trooper, kinunana nga agsapa idi kalman a nagtawag ti asawana a mangkumkumusta kadakuada iti anakda.
Nupay kasta, ala una idi malem kalman a naidanon kenkuana ti nakalkaldaang a damag, ken iti alas kwatro ti malem a nakumpirmar ti panakatay ti asawana.
Iti agdama ket ur-urayenda ti tawag dagiti maseknan nga otoridad para iti panagbiaheda sadiay Manila tapnu sabaten ti bangkay ti asawana.
Kinunana a maimasayag ti bangkay ti asawana sadiay Sunnyside Fairview, Baguio City sakbay a maiyawid sadiay Bauko, Mt. Province a pakaitabonan daytoy.
Inladawanna met ti asawana a nasingpet, responsable, naanus ken awan ti maibagana iti daytoy.
Addaanda iti maysa nga anak a babai a mangrambak iti maikalima a kasangayna inton Nobyembre.
Rambakan met kuma ni PO3 Tegwa ti maikaduapulo ket siyam a kasangayna inton Disyembre 8.
Dumanonen iti lima a tawen ni Tegwa iti serbisyo, manipud iti PNP Special Action Force ket nagsanay daytoy iti scout ranger course ti Philippine Army.
