BAGUIO CITY – Agyamyaman ti asawa ti Igorot Marine Corporal a pimmusay iti rinnupak iti nagbaetan ti tropa ti gobyerno ken dagiti kameng ti Abu Sayyaf Group sadiay Pugad, Panamao, Sulu idi parbangon kalman gapu kadagiti maaw-awatna a pampatibker ti pakinakem.
Nabigbig ti nasao a banuar a ni Marine Corporal Romnick Culhi Estacio a tubo ti Ifugao ken La Union a nakadestino iti 62nd Marine Company, Marine Reconnaisance Group ti Philippine Marine Corps.
Sigun kenni Corporal Marijoe Estacio, inaramid ti asawana ti amin a kabaelan daytoy para iti Pilipinas tunggal adda ti pakaisungalngalanda a rinnupak pakairamanan ti Marawi Siege.
Kinunana a saan a kayat ti asawan a maidestino sadiay Manila.
Innayonna a forever a banuar ti asawana.
Pimmusay ni Corporal Romnick Estacio bayat a nadangran ti maysa a kadwana idi nakarinnupak ti tropada dagiti Abu Sayyaf bayat ti operasyon dagitoy a nagresulta iti panangispalda iti dua a mangngalap nga Indonesian a kinawtibo dagiti Abu Sayyaf idi September 23, 2019 iti taaw ti Lahad Datu, Sabah.
Napapatay metlaeng ti maysa a miembro ti Abu Sayyaf iti nasao nga operasyon.
Maipalagip a nagserbi nga augmentation force ti tropa ti gobyerno sadiay Marawi Siege ti grupoda Corporal Estacio a nakatayan ti inaudi a kabsatda a ni Private First Class Jethro Fil Culhi Estacio a kameng ti 1st Scout Ranger Company, 1st Scout Ranger Battalion, Philippine Army.
Adtoy ti nagbalin a panakiyuman idi ti Bombo Radyo Baguio kenni Cpl. Estacio: http://archive.bomboradyo.com/narigat-ti-sitwasyon-mi-ditoy-agibubuwis-kami-iti-biag-marine-corporal/
