BAGUIO CITY – Maysa manen a miyembro ti Team Lakay ti nagballigi iti laban daytoy sadiay Mumbai, India idi kanikadwa.
Sigun kenni Jeremy Pacatiw, naragsakan daytoy iti nagbalin a resulta ti labanna kontra kenni Chaitanya Gavali kalpasan a naabak daytoy kontra kenni Hamza Kooheji idi napalabas a tawen.
Kinunana a dakkel nga adal ti naalana manipud iti laban daytoy kontra kenni Kooheji isut gapuna a daytoy metlaeng ti inaramatna nga inspirasyon iti laban daytoy kontra kenni Gavali.
Impettengna a karaman kadagiti adal a naala daytoy ket ti panangsurutna iti game plan ken ti panagadalna nga umno iti pagkapsutan ken pagpigsaan ti kalabanna.
Innaklon pay ti atleta a narigatan daytoy iti immuna a rikus ti labanda kalpasan nga in-take down daytoy ni Gavali.
Namnamaen met ti MMA fighter a bumayag daytoy iti napilina nga sport gaputa daytoy ti nangtulong kenkuana tapnu makaur-ur iti kuwarta nga araramatenna tapnu agadal.
Ni Pacatiw ket manipud Kapangan, Benguet, ken iti agdama ket 3rd year criminology student ditoy siudad ti Baguio.
