BAGUIO CITY – Mangnamnama ni Igorot mix martial artist John Cris ‘Happy Feet’ Corton a makasubbot daytoy iti maikatlo a labanna iti Brave Combat Federation.
Naituding a makasango ti Team Lakay fighter ni Dansheel ‘Mamu’ Moodley ti South Africa iti co-main event ti Brave CF 31 a maangay sadiay Durban, South Africa inton December 7.
Puntirya ni Corton a mapasayaat ti rekordna kalpasan a nagsagrap daytoy iti nagsaruno a panaka-abak ita a tawen.
Kinunana nga inspirado daytoy a mangabak kasaruno ti kaudian a panangabak ti pagayamna a ni Stephen Loman a nagtalinaed a bantamweight world champion iti maikapat a gundaway.
Innayon ni Corton nga addan daytoy iti maudi a dua a lawas ti panagsaganana para iti napintas a labanda iti beterano nga MMA fighter ti South Africa.
